Bronxektaziya nədir və yaranma səbəbləri hansılardır?
Bronxektaziya – ağciyər bronxlarının geri dönməz şəkildə genişlənməsi və divarlarının zədələnməsi ilə xarakterizə olunan xroniki bir xəstəlikdir.
Bu zədələnmə nəticəsində bronxlarda bəlğəm toplanır, təmizlənmə prosesi pozulur və nəticədə tez-tez təkrarlanan infeksiyalar yaranır. Pasiyentlər çox vaxt illərlə davam edən, xüsusilə səhərlər artan bəlğəmli öskürək və təngnəfəslikdən şikayət edirlər.
Bəs bu xəstəliyə yol açan əsas səbəblər hansılardır?
Ən Çox Rast Gəlinən Səbəblər
Keçirilmiş Ağır İnfeksiyalar
Uşaqlıq dövründə keçirilmiş ağır pnevmoniya (ağciyər iltihabı), göyöskürək və ya qızılca kimi infeksiyalar bronx divarlarına ciddi zərər verərək illər sonra bronxektaziyanın yaranmasına səbəb ola bilər.
Vərəm (Tuberkulyoz)
Azərbaycanda vərəm keçirmiş şəxslərdə bronxektaziya sıx rast gəlinən bir fəsaddır. Vərəm ağciyər toxumasında çapıqlar yaradaraq bronxların strukturunu pozur.
İmmun Çatışmazlığı
Orqanizmin müdafiə sisteminin zəif olması (məsələn, hipoqammaqlobulinemiya) ağciyərlərin infeksiyalara qarşı müqavimətini azaldır. Tez-tez təkrarlanan bronxitlər zamanla bronxektaziyaya çevrilir.
Genetik Amillər (Kistik Fibroz)
Xüsusilə uşaq və gənc yaşlarda başlayan bronxektaziyalarda genetik faktorlar, xüsusən də kistik fibroz xəstəliyi mütləq araşdırılmalıdır.
Bronxların Daxili Tıxanmaları
Bronxa düşən yad cisimlər, şişlər və ya böyümüş limfa düyünlərinin bronxu sıxması nəticəsində həmin nahiyədə hava axını pozulur və genişlənmə baş verir.
Aspirasiya
Reflüks (GERD) xəstəliyi olan şəxslərdə mədə turşusunun daim tənəffüs yollarına sızması (mədə möhtəviyyatının ağciyərə qaçması) bronxlarda xroniki iltihab və zədələnmə yaradır.
Mövzu ilə bağlı ətraflı video
Nə vaxt həkimə müraciət etməli?
- Əgər Sizi 3 həftədən artıq davam edən bəlğəmli öskürək narahat edirsə;
- İldə bir neçə dəfə ağır bronxit və ya pnevmoniya keçirirsinizsə;
- Öskürək zamanı qanlı bəlğəm müşahidə olunursa;
- Gündəlik təngnəfəslik və zəiflik hiss edirsinizsə;